دوای شێركۆ بێكەس، مەحاڵە ئەدەبی كوردی شاعیرێكی گەورە بەو قەبارە بەخۆیەوە ببینێ‌

04/08/2015    01:38

دوای شێركۆ بێكەس، مەحاڵە ئەدەبی كوردی شاعیرێكی گەورە بەو قەبارە بەخۆیەوە ببینێ‌ 


Têkst

ئامادەکردنی: دالیا کەمال

دوای دووساڵ لە کۆچی شاعیر شێرکۆ بێکەس و لە ساڵڕۆژی ئەو شاعیرەدا، شاعیری ناسراوی شاری هەولێر عەبدولموتەڵیب عەبدوڵڵا دەربارەی ئەو شاعیرە بۆ سولی ئۆن وێب دەدوێت و وەڵامی هەردوو پرسیاری " کاریگەری شعری شیرکۆ بیکەس لە سەر فەزای شعری کوردی؟" و " غیابی ٸەو چەندە کاریگەری هەبووە لە سەر شعری کوردی؟" دەداتەوە.


لە وەڵامی پرسیاری "کاریگەری شعری شیرکۆ بیکەس لە سەر فەزای شعری کوردی؟" عەبدولموتەڵیب عەبدوڵڵا دەڵێت: "راستە قسەكردن لەسەر شێركۆ دەرفەت و بەدواداچوونی قووڵی گەرەكە، بەڵام بەلای منەوە شێركۆ بێكەس وەك بەرهەمی شیعریی فەزایەكی گەورەی شیعریی كوردی (بەشی باشوور و رۆژهەڵات) پێكدەهێنێ‌، بێگومان وەك مەعریفەی شیعری، وەك جوانی كاریگەری خۆی هەیە. ئەو فەزایەی كە ئێوە ئاماژەتان بۆ كردووە زۆر بە جوانی لە قەسیدەی (كۆچ)ەوە دەست پێدەكات و وزەكانی خۆی لە هەستی شیعریی و توانای دەربڕین و وێنەی شیعریدا هەڵدەگرێتەوە، لە دوای (دەربەندی پەپولە)ش ئەوەی بەشێكی زۆری ئەو گوتار و هێزە شیعرییەی راگرتووە، هەر تەنها بەكارهێنانی وشە و دەستەواژەی نوێ‌ نییە، بەڵكو بەرفراوانكردنی فەزای ناوبراوە، هەر ئەوەشە شێوەیەكی ئازادانەتر بە (گوتاری مانەوە) دەدات. گوتاری مانەوە وێڕای توانای دەربڕین و وێنەی شیعریی كۆڵەكەیەكی سەرەكی گوتاری شیعریی شێركۆیی پێكدەهێنێت، ئەو گوتارە شیعرییە تەعبیر لە گوتارێكی دەستەجەمعی و نەتەوەیی و گشتی دەكات، دواتر لە ئەزموونی شێركۆییدا تەرجەمەی (پرسی مانەوە) دەبێت. ئەو گوتار و پرسە شیعرییەی كە ئاماژەمان پێدا بەرە بەرە شێركۆ بێكەس لە شێوازگیریی نزیك دەكاتەوە، ئەو شێوازگیرییەش وەك كۆنتێكستی شێركۆیی دەمێنێتەوە و دواجار لە (خاچ و مار) بە ترۆپك دەگات. لەدوای خاچ و مار ئەوەی بەشی زۆری شێركۆ دەنووسێتەوە ئیلقای شێركۆییە... لێرەوە هەوڵدەدەم پرسیارەكەتان رووتتر بكەمەوە و بڵێم ئایا پرسی مانەوە، یان ئیلقای شێركۆیی لە شیعری كوردیدا تا چەند كاریگەرە؟ بێگومان وەك پێویست ئەمڕۆی شیعریی كوردی غەمی ئەو گوتار و ئیلقایەی نییە، كەواتە شێركۆ بێكەس لە رووی وێنەی شیعریی و هەستی شیعریی و توانای دەربڕین كاریگەری ماوە، بەڵام وەك گوتاری شیعریی كەمترین كاریگەریی لە ناوەندی شیعریی كوردی (بەشی باشوور و رۆژهەڵات) دەبینرێت، ئەوەش وەك من تێگەیشتبم پەیوەندی بە شێوازگیریی شێركۆییەوە هەیە!

ئەو شاعیرە لە وەڵامی پرسیاری "غیابی ٸەو چەندە کاریگەری هەبووە لە سەر شعری کوردی؟" بۆ خوێنەرانی سولی ئۆن دەنووسێت: "شیعری ئیبداعی پەیوەندی بە جیاوازییەوە دەكات، نەك شێوازگیریی، بەو مانایەش دەق خاوەنی بونیادی كارتێكردنی دیاریكراوە و ئەوەی بەردەوامی رەنگ دەكات جیاوازییە، نەك جێگیربوون، كەواتە لێرەدا كاریگەری زیاد لە پێویست میسالی دەكەوێتەوە، نەك واقیعی، چونكە ژیان بەردەوامە. شیعریی ئیبداعی ناكەوێتە ژێر هەیمەنەوە، بەڵكو لەگەڵ جیاوازییەكان ڕێ‌ دەكات، ئەوەی دەمێنێتەوە جوانییە و جوانیش بە نسبەت زمان ناشێ‌ بە سەر شتی هەبوودا جێگیر بكرێت، دەمەوێت بڵێم دەقی داهێنەرانە لەوێدا خۆی دەبینێتەوە، كە پێوەرە هونەرییە باوەكان تەجاوز دەكات و ئاسۆی چاوەڕوانی خوێنەر و پانتایی رۆشنبیری باو دەگۆڕێت.

لە کۆتاییدا عەبدولموتەڵیب عەبدوڵڵا دەڵێت: "بە كورتی لە دوای شێركۆ بێكەس، مەحاڵە ئەدەبی كوردی شاعیرێكی گەورە بەو قەبارە بەخۆیەوە ببینێ‌، چونكە ئێستای دنیا، هەیمەنەی جێهێشتووە و كەوتۆتە زەمەنی جیاوازییەوە."








هه‌والی زیاتر