داوای ئازادکردنی کەیوان کەریمی دەکرێت

21/10/2015    23:07

داوای ئازادکردنی کەیوان کەریمی دەکرێت 


Cînema

سولی ئۆن وێب

بڕیارە ٢١ تا ٢٧ی ١٠ی ٢٠١٥ لە شاری پاریسی وڵاتی فەڕەنسا فێستیڤاڵی سینەمای کوردی بەڕێوەبچێت کە تیایدا ژمارەیەکی بەرچاو لە کورتەفیلم، فیلمی دیکۆمێنتاری و درێژە فیلمی دەرهێنەرانی هەرچوارپارچەی کوردستان نمایش بکرێت، هونەرمەندانی بەشداربووی فێستیڤاڵەکە بەر لە دەستپێکی فێستیڤاڵەکە بەیاننامەیەکیان بڵاوکردووەتەوەو تیایدا ئیدانەی ئەو بڕیارەی دادگای ئێران دەکەن کە بەرامبەر فیلمسازی ڕۆژهەڵاتی کوردستان کەیوان کەریمی و دوو هونەرمەندی دیکەی ئێران گیراوەتە بەرو داوادەکەن سیستمی قەزایی ئێران بەشێوەیەکی دادپەروەرانە بەو کەیسەدا بچێتەوە، سولی ئۆن وێب دەقی ئەو بەیاننامەیە بۆ خوێنەران بڵاودەکاتەوە.

دەقی بەیاننامەکە:
به‌یاننامه‌یه‌ك بۆ پشتگیری له‌ هونه‌رمه‌نده‌ سزادراوه‌كانی ئێران و کوردستانی ئێران 

به‌گوێره‌ی هه‌واڵه‌كانی سه‌ر به‌ ئاژانسه‌ هه‌واڵنێریه‌كانی ئێران و جیهان، لقی ٢٨ی دادگای شۆڕشی ئیسلامیی شاری تاران، كه‌یوان كه‌ریمی ده‌رهێنه‌ری كوردیی رۆژهه‌ڵاتی كوردستانی به‌ شه‌ش ساڵ زیندان و ٢٢٣ لێدان به‌ قامچی سزاداوه‌.

كه‌یوان كه‌ریمی به‌ بیانووی ''سووكایه‌تی به‌ پیرۆزیه‌كان'' و '' ته‌وقه‌ كردن له‌گه‌ڵ نامه‌حره‌م'' تۆمه‌تبار كراوه‌. به‌ڵام هۆكاری سه‌ره‌كی، پێداگری كه‌یوان بووه‌ بۆ به‌رهه‌مهێنانی فیلمێك له‌سه‌ر گرافیتی له‌ شاری تاران.

ئه‌میر ره‌یسیان پارێزه‌ری ئەو دەرهێنەرە تێكڕای ئه‌و تۆمه‌تانه‌ ره‌ت ده‌كاته‌وه‌ و ده‌ڵێت كه‌یوان به‌شێوه‌ی یاسایی و رێگه‌پێدراو فیلمی به‌رهه‌مهێناوه‌. كه‌یوان كه‌ریمی له‌ دایكبووی ١٩٨٥ی سه‌ر به‌ بانه‌ی رۆژهه‌ڵاتی كوردستانه‌ كه‌ فیلمه‌كانی خه‌ڵاتگه‌لی جۆراوجۆری له‌ فێستیڤاڵە نێونه‌ته‌وه‌ییه‌كان وەرگرتووە. فیلمگەلی "سنووری شكاو '' و ''ژن و پیاوی كرێكار'' له‌ به‌رهه‌مه‌ سه‌ركه‌وتووه‌كانی ناوبراون.

كۆماری ئیسلامیی ئێران شه‌پۆلێکی نوێی تۆقاندن، گرتن، ئه‌شكه‌نجه‌ و هه‌ڕه‌شه‌كردنی دەستپێکردووە كه‌ له‌م نێوه‌ندەدا هونه‌رمه‌ندانی ئێرانی و كوردیش بێبه‌ش نه‌بوون.

ئه‌م شه‌پۆله‌ به‌ كه‌یوان كه‌ریمی نه‌وه‌ستاوە‌ و دوو شاعیری نوێخوازی ئێرانی‌ (فاتمه‌ ئیختساری و مه‌هدی مووسه‌وی) و هەروەها ئاتنا فه‌رقدانی كاریكاتێریستێکی ئێرانی گرتۆته‌وه‌. 

ئێمه‌ وه‌كوو هونه‌رمه‌ندان و بەشداربووانی فێستیڤاڵی فیلمی كوردیی له‌ پاریس، ئیدانەی هه‌رچه‌شنه‌ كرده‌وه‌یه‌كی نه‌شیاو ده‌كه‌ین به‌رامبه‌ر بە هونه‌رمه‌ندانی كورد و ئێرانی و داوا‌ دەكه‌ین سیسته‌می قه‌زایی ئێران به‌ شێوه‌یەكی دادپه‌روه‌رانه‌ به‌و كه‌یسانه‌دا بچێته‌وه‌.



هه‌والی زیاتر