تەقەڵ
نارين ڕۆستەم
کاتژمێر دزراوە و
دایکم دەیخاتە ملی دێوەکەوە.
لەو وێنەیەی دەیکێشم،
پاڵ کەوتووە.
بەڵام لە خەونەکانمدا ..
بە قۆچەکانی کارەبا دەکوژێنێتەوە و
ئاگردانەکە ئاو دەدات.
بێزاریش بێت،
لە ھەورەبان ساپساپانێ دەکات و
ساپیتەی کەلاوەکەمان کون دەبێت.
بۆ دۆزینەوەی دێوەکە،
تەپوتۆزی فانۆسەکان دەتەکێنم.
(عەلائەدین) بە مافوورێکی شەقوشڕەوە دەردەپەڕێت
چیڕۆکەکەی، وێسکیی بەسەردا ڕژاوە و
پاڵەوانە مەست و گەشەکان،
کورسیی خۆیان بۆ یەکتری چۆڵ کردووە.
تۆپەکەم دیار نییە!
ھەواڵی ناپرسم و دەزانم
لە سکی دێوەکەدا، چاوەڕوانی فیکەی کۆتاییە.
دێو برسی بێت،
ئەو ورتکەسەموونانەیش بۆ ناسینەوەی ڕێگەی ماڵەوە
ڕۆیان دەکەم،
حەپەلووش دەکات.
لەبەرئەوەیە، ناوەناوە ڕێگەم لێ تێک دەچێت و
بەرەو چۆڵەوانی شۆڕ دەبمەوە.
تا دەگەڕێمەوە،
گەردەلوول کەلاوەکەمان ھەڵدەلوشێت و
توێکڵەکەی تف دەکاتەوە.
ڕادەکەم، دێوەکە بدۆزمەوە
ناوی نازانم!
