عەباس کیاڕۆستەمی
لە فارسییەوە: سەرکەوت جەبار
بۆ: لاژە تەها
_________
با
باڵندەکە لەگەڵ خۆی دەبات
بۆ ئەو لایەی کە دەیویست
بۆ لایەک
کە باڵندەکە نەیدەویست.
*
خەو دەبینم
سەربازێکم
بێ سەر.
**
لەنێوان خێر و شەڕدا
خێرم هەڵبژارد
ڕیگەیەک بوو
پڕ لە شەڕ.
***
منداڵەکە پرسی
ئایا پشتی ژیژکیش
دەخورێت؟
****
هێشتاش
باوەڕناکەم کە
ئەمە زەوییە
کە دەسوڕێتەوە.
*****
سەربازێک کە
پەنجەی دەخستە گوێیەوە
لەکاتی تەقاندنی تۆپەکە،
پەنجەی لەدەست دا
وە گوێی و چاویشی
لە چاوتروکاندنێکدا.
******
یەک فیشەک
یەک مێشک
یەک ڕۆژ.
*******
لەنێوان من و مانگ
گفتوگۆیەکە
کە نە مانگ تێدەگات
نە منیش.
********
لەنێوان پەڵەهەورگەلێکی ڕەش
مانگ
ئارەزووی خۆنواندنی هەیە.
________
بۆ گەیشتن بە بەهەشت
تێپەڕین بە ڕێگەی دۆزەخدا
ناچارییە.
**
ژیان
تۆمەتێکی ناڕەوایە
بۆ بێنەواکان.
***
لە ناسنامەکەمدا
وێنەیەک هەیە
تێپەڕینی زەمەن
دەسەلمێنێت.
****
ڕوویەکی پەنجەرەکە
بەرەو منە
ڕووەکەی دیکەی
بەرەو ڕێبوارێک کە تێدەپەڕێت.
*****
گورگێک
لە بۆسەدا
******
لە خەیاڵمدا
دۆزەخێک هەیە
گەرمم دەکاتەوە
لە زەمهەریری تەنهایی.
*******
لەگەڵ یەکەمین بای پایزیی
گەڵایەکی بچووک هاتە ژوورەکەم
کە نەمدەناسی.
********
لە نەبوونی تۆدا
لەگەڵ خۆمم
گفتوگۆ دەکەین و دەگەینە ئەنجام
لەسەر هەموو شتێک
زۆر بە سادەیی.
*********
ئەسپێکی برینداری
بێخاوەن.
**********
دێهاتییەکی ماندوو
چووەتە خەوەوە
لەژێر سێبەری داهۆڵێك.
***********
دێهاتییەکی ماندوو
بەخەبەر دێت
لە عارەقەی نێوچەوانی داهۆڵەکە.
************
لە خۆڵەمێش
بتێک دروست دەکەم
وە دیسانەوە ئەیسوتێنمەوە
بە ئاگر.
*************
هەست بە ئازادی
ئەکەم
لە هەڵبژاردنی ئازار.
**************
کوام ڕۆژی هەفتە
کۆتایی دێت
یاری شەممە لەگەڵ هەینی؟
***************
بێزارم لە زمان
زمانی تاڵ
زمانی توند
لە زمانی فەرماندان
لە زمانی کینایە
لەگەڵ من
بە زمانی ئاماژە
بدوێ.
______
بەفر دەبارێت
بەفر دەبارێت
بەفر دەبارێت
ڕۆژ بەکۆتا دێت
بەفر دەبارێت
شەو.
**
دوکەڵی مۆم
ڕەشی دەکات
باڵی ڕەنگاوڕەنگی پەپولە.
***
یەکێک لە ڕاهیبەکان
شتێکی وت!
ئەوانی دیکە پێکەنین
بەدەنگی بەرز.
****
زەمینلەرزە
وێرانیکرد تەنانەت
کۆگای دەغڵی مێروولەکانیش.
*****
بەرهەمی دوو ڕۆژی
کاری جاڵجاڵۆکە
تێکدەچێت
بە گسکی خزمەتکاری پیر.
******
پیاوێکی نابینا
کات دەپرسێت
لە منداڵێکی ئیبتیدائی.
*******
بارانێکی بەهاریی
هێلانەی کۆترێک
پڕ ئاو دەکات.
********
گوڵێکی بچکۆلەی بێناو
ڕواوە بە تەنهایی
لە کەلێنی کێوێکی گەورە.
*********
دەریا تاریک
کەناریش تاریک
چاوەڕوانی خۆر بم
یان مانگ؟
_____
شیعرەکان لە کتێبی شیعری (با و گەڵا)، (گورگێک لە بۆسەدا) و (پیاسەکردن لەگەڵ با)وە وەرگیراون
